ಶಿಲ್ಪಗಳಿಗೆ ಜೀವ ತುಂಬುವ ‘ಹರ ಶಿಲ್ಪಕುಟಿರ’:

ಚೈತನ್ಯ ನ್ಯೂಸ್ 24 ನರೇಗಲ್ಲ ಮೇ.25:

ವಿಶೇಷ ವರದಿ: ಬಸವರಾಜ ಪಲ್ಲೇದ ಉಪನ್ಯಾಸಕರು, ಅಬ್ಬಿಗೇರಿ

​ಕಲೆ, ಮಾನವನ ಭಾವನೆಗಳು ಮತ್ತು ಕಲ್ಪನೆಗಳ ಅಭಿವ್ಯಕ್ತಿ. ಕಾಲ ಬದಲಾದಂತೆ ಕಲಾ ಲೋಕವೂ ಬದಲಾಗಿವೆ. ಸಾಂಪ್ರದಾಯಿಕವಾಗಿ ಶಿಲ್ಪಕಲೆಯಲ್ಲಿ ಕಲ್ಲು, ಮರ, ಮಣ್ಣು ಮತ್ತು ಲೋಹಗಳನ್ನು ಬಳಸಲಾಗುತ್ತಿತ್ತು. ಆಧುನಿಕ ಯುಗದಲ್ಲಿ ಶಿಲ್ಪಕಲಾ ಕ್ಷೇತ್ರದಲ್ಲಿ ಕ್ರಾಂತಿಕಾರಿ ಬದಲಾವಣೆ ಬಂದಿದೆ. ಅದುವೆ ಫೈಬರ್ ಗ್ಲಾಸ್ ಅಥವಾ ಫೈಬರ್ ಶಿಲ್ಪಕಲೆ. ಹಗುರವಾದ, ಗಟ್ಟಿಯಾದ ಮತ್ತು ದೀರ್ಘಕಾಲ ಬಾಳಿಕೆ ಬರುವ ಫೈಬರ್ ಶಿಲ್ಪಗಳು ಇಂದು ಸಾರ್ವಜನಿಕ ಉದ್ಯಾನವನಗಳು, ವಸ್ತು ಸಂಗ್ರಹಾಲಯಗಳು, ವಾಣಿಜ್ಯ ಸಂಕೀರ್ಣಗಳು ಮತ್ತು ಗೃಹ ಅಲಂಕಾರಗಳಲ್ಲಿ ಪ್ರಮುಖ ಸ್ಥಾನ ಪಡೆದಿವೆ. ಇಂತಹ ಶಿಲ್ಪ ತಯಾರಿಸುವ, ಫೈಬರ್ ಶಿಲ್ಪಕಲೆ ಕೇಂದ್ರ ಗದಗ ಜಿಲ್ಲೆ ಅಬ್ಬಿಗೇರಿ ಯಲ್ಲಿದೆ.

ಹರ ಶಿಲ್ಪಕಲಾ ಕುಟಿರ:
ಗದಗ ಜಿಲ್ಲೆಯ ರೋಣ ತಾಲ್ಲೂಕಿನ ಅಬ್ಬಿಗೇರಿ ಗ್ರಾಮದ ಶಿವರಾಜ ಕಮ್ಮಾರ ರವರ ‘ಹರ ಶಿಲ್ಪಕಲಾ ಕುಟಿರ’ ಇದಕ್ಕೊಂದು ಸೂಕ್ತ ಉದಾಹರಣೆ. ಈ ಕುಟಿರ ಕೇವಲ ಒಂದು ಕಲಾ ಕೇಂದ್ರವಲ್ಲ. ಅದು ಗ್ರಾಮೀಣ ಭಾರತದ ಪ್ರತಿಭೆ ಜಾಗತಿಕ ಮಟ್ಟದಲ್ಲಿ ಹೇಗೆ ಗುರುತಿಸಿಕೊಳ್ಳಬಲ್ಲದು ಎಂಬುದಕ್ಕೆ ಅತ್ಯುತ್ತಮ ಉದಾಹರಣೆ. ಸಾಂಪ್ರದಾಯಿಕ ಕರಕುಶಲತೆ ಮತ್ತು ಆಧುನಿಕ ಫೈಬರ್ ತಂತ್ರಜ್ಞಾನವನ್ನು ಮೇಳೈಸಿ, ಅಬ್ಬಿಗೇರಿ ಗ್ರಾಮದ ಹೆಸರನ್ನು ದೇಶದಾದ್ಯಂತ ಪಸರಿಸುತ್ತಿರುವದು ಈ ಕುಟಿರದ ಸಾಧನೆ.

ಕಲಾಕೃತಿಗಳಲ್ಲಿರುವ ವೈವಿಧ್ಯತೆ:
ಹರ ಶಿಲ್ಪಕಲಾ ಕುಟಿರದ ಪ್ರಮುಖ ಹೆಮ್ಮೆಯೆಂದರೆ ಅದರ ಕಲಾಕೃತಿಗಳಲ್ಲಿರುವ ವೈವಿಧ್ಯತೆ. ಕೇವಲ ಒಂದು ನಿರ್ದಿಷ್ಟ ಶೈಲಿಗೆ ಸೀಮಿತವಾಗದೆ, ವಿವಿಧ ಪ್ರಕಾರದ ಶಿಲ್ಪಗಳನ್ನು ಇಲ್ಲಿ ಅತ್ಯಂತ ನಿಖರವಾಗಿ ಮಾಡುತ್ತಾರೆ. ​ಧಾರ್ಮಿಕ ಮತ್ತು ಪೌರಾಣಿಕ ಮೂರ್ತಿಗಳು, ದೇವ-ದೇವತೆಗಳು, ಯೋಗಿಗಳು, ಮತ್ತು ತಪಸ್ವಿಗಳ ಮೂರ್ತಿಗಳಲ್ಲಿ ಆಧ್ಯಾತ್ಮಿಕ ಭಾವನೆ ಹಾಗೂ ಮುಖದ ಪ್ರಸನ್ನತೆಯನ್ನು ತರುವುದು ಸುಲಭವಲ್ಲ. ಶಿವರಾಜ ಕಮ್ಮಾರರು ಫೈಬರ್ ಮಾಧ್ಯಮದಲ್ಲಿ ಈ ಜೀವಂತಿಕೆಯನ್ನು ತರುವಲ್ಲಿ ಯಶಸ್ವಿಯಾಗಿದ್ದಾರೆ.
​ಪ್ರಾಣಿ ಮತ್ತು ಪಕ್ಷಿ, ಆನೆ, ಕುದುರೆಗಳಂತಹ ಭವ್ಯವಾದ ಪ್ರಾಣಿಗಳ ಶಿಲ್ಪಗಳನ್ನು ನೈಜ ಗಾತ್ರದಲ್ಲಿ ಸಿದ್ಧಪಡಿಸುವುದು ತಾಂತ್ರಿಕವಾಗಿ ಸವಾಲಿನ ಕೆಲಸ. ಇವುಗಳನ್ನು ಉದ್ಯಾನವನಗಳು, ದೊಡ್ಡ ದೊಡ್ಡ ಮಹಲುಗಳ ಮೇಲ್ಬಾಗದ ಮಾರ್ತಿಗಳು, ಮಂಟಪಗಳ ಅಲಂಕಾರಕ್ಕಾಗಿ ಹೆಚ್ಚಾಗಿ ಬಳಸಲಾಗುತ್ತದೆ. ಸ್ಥಳೀಯ ಕಲೆಯ ಜೊತೆಗೆ ‘ಗ್ರೀಕ್ ವಾಸ್ತುಶಿಲ್ಪ’ದ ಮಾದರಿಗಳನ್ನು ತಯಾರಿಸುವುದು ಇವರ ಜಾಗತಿಕ ಕಲಾ ದೃಷ್ಟಿಕೋನವನ್ನು ತೋರಿಸುತ್ತದೆ.

ಕಲಾ ಭೂಪಟದಲ್ಲಿ ಸ್ಥಾನ:
​​ಒಂದು ಸಣ್ಣ ಹಳ್ಳಿಯಿಂದ ಆರಂಭವಾದ ಈ ಕಲಾ ಪ್ರವಾಸ ಇಂದು ದಕ್ಷಿಣ ಭಾರತದ ಪ್ರಮುಖ ರಾಜ್ಯಗಳಿಗೆ ವಿಸ್ತರಿಸಿದೆ. ಆಂಧ್ರಪ್ರದೇಶ, ತಮಿಳುನಾಡು ಮತ್ತು ಕರ್ನಾಟಕದ ರಾಜಧಾನಿ ಬೆಂಗಳೂರಿನಂತಹ ಮಹಾನಗರಗಳಿಂದ ಬೇಡಿಕೆಗಳನ್ನು ಪಡೆಯುವುದು ಸಾಮಾನ್ಯ ವಿಷಯವಲ್ಲ. ಇದು ಕಲಾಕೃತಿಗಳ ಗುಣಮಟ್ಟ ಮತ್ತು ವಿಶ್ವಾಸಾರ್ಹತೆಗೆ ಹಿಡಿದ ಕನ್ನಡಿಯಾಗಿದೆ. ಫೈಬರ್ ಶಿಲ್ಪಗಳು ತೂಕದಲ್ಲಿ ಹಗುರವಾಗಿರುವುದರಿಂದ, ಅಬ್ಬಿಗೇರಿಯಿಂದ ನೂರಾರು ಕಿಲೋಮೀಟರ್ ದೂರದಲ್ಲಿರುವ ತಮಿಳುನಾಡು ಅಥವಾ ಆಂಧ್ರಕ್ಕೆ ಯಾವುದೇ ಹಾನಿಯಾಗದಂತೆ ಸುಲಭವಾಗಿ ಸಾಗಿಸಲು ಸಾಧ್ಯವಾಗಿದೆ.
ಯಾವುದೋ ಒಂದು ಕಾರ್ಖಾನೆ ಅಥವಾ ಉದ್ಯಮದಿಂದ ಹಳ್ಳಿಗೆ ಸಿಗದ ಕೀರ್ತಿ, ಇಂತಹ ಕಲಾ ಕುಟಿರದಿಂದ ಸಿಗುತ್ತದೆ. ಇಂದು ‘ಹರ ಶಿಲ್ಪಕಲಾ ಕುಟಿರ’ದಿಂದಾಗಿ ಅಬ್ಬಿಗೇರಿ ಗ್ರಾಮವು ದಕ್ಷಿಣ ಭಾರತದ ಕಲಾ ಭೂಪಟದಲ್ಲಿ ಅಬ್ಬಿಗೇರಿಯು ತನ್ನದೇ ಆದ ವಿಶಿಷ್ಟ ಸ್ಥಾನವನ್ನು ಪಡೆದುಕೊಂಡಿದೆ. ಕಲಾ ಪ್ರೇಮಿಗಳು ಮತ್ತು ಸಂಶೋಧಕರು ಈ ಊರಿನ ಕಡೆಗೆ ತಿರುಗಿ ನೋಡುವಂತೆ ಮಾಡಿದೆ.

ಹಳ್ಳಿಯಲ್ಲೇ ಉದ್ಯೋಗ ಸೃಷ್ಟಿ:
ಫೈಬರ್ ಶಿಲ್ಪ ತಯಾರಿಕೆಯಲ್ಲಿ ಮಣ್ಣಿನ ಮಾದರಿ ಮಾಡುವುದು, ಅಚ್ಚು ತೆಗೆಯುವುದು, ಫೈಬರ್ ಲೇಯರಿಂಗ್, ಗ್ರೈಂಡಿಂಗ್ ಮತ್ತು ಪೇಂಟಿಂಗ್‌ನಂತಹ ಹಲವು ಹಂತಗಳಿವೆ. ಇದಕ್ಕೆ ಸ್ಥಳೀಯ ಯುವಕರನ್ನು ಬಳಸಿಕೊಳ್ಳುವ ಮೂಲಕ ಹಳ್ಳಿಯಲ್ಲೇ ಉದ್ಯೋಗ ಸೃಷ್ಟಿ ಮಾಡಿದ್ದಾರೆ.ಗ್ರಾಮೀಣ ಭಾಗದ ಜನರಿಗೆ ಆಧುನಿಕ ರಾಸಾಯನಿಕಗಳು ಮತ್ತು ತಂತ್ರಜ್ಞಾನದ ಬಳಕೆಯನ್ನು ಕಲಿಸುವ ಮೂಲಕ, ಅವರಿಗೆ ಹೊಸ ಕೌಶಲ್ಯವನ್ನು ಧಾರೆ ಎರೆದಿದ್ದಾರೆ. ಸಾಂಪ್ರದಾಯಿಕವಾಗಿ ವಿಶ್ವಕರ್ಮ ಸಮುದಾಯ ಅಥವಾ ಶಿಲ್ಪಕಲಾ ಕಲಾವಿದರು ಕಲ್ಲು-ಮರಗಳಲ್ಲಿ ಕೆಲಸ ಮಾಡುತ್ತಿದ್ದರು. ಆದರೆ ಶಿವರಾಜ ಕಮ್ಮಾರರು ಕಾಲಕ್ಕೆ ತಕ್ಕಂತೆ ಬದಲಾಗಿ ಫೈಬರ್ ಗ್ಲಾಸ್ ಮಾಧ್ಯಮವನ್ನು ಆರಿಸಿಕೊಂಡಿರುವುದು ಅವರ ಪ್ರಗತಿಪರ ಚಿಂತನೆಯನ್ನು ತೋರಿಸುತ್ತದೆ. ಇವರ ಕಲಾಕೃತಿಗಳು ದೀರ್ಘಕಾಲ ಬಾಳಿಕೆ ಬರುತ್ತವೆ ಬಿಸಿಲು-ಮಳೆಗೆ ಬೇಗನೆ ಹಾಳಾಗುವುದಿಲ್ಲ.
​ಕಡಿಮೆ ಸಮಯದಲ್ಲಿ ಹೆಚ್ಚು ಮೂರ್ತಿಗಳನ್ನು ತಯಾರಿಸಿ ಗ್ರಾಹಕರಿಗೆ ತಲುಪಿಸುತ್ತಾರೆ. ಇವುಗಳನ್ನು ಹೊರಾಂಗಣ ಪ್ರದರ್ಶನಗಳಿಗೆ ಹೆಚ್ಚಾಗಿ ಬಳಸಲಾಗುತ್ತದೆ. ​ಕಲ್ಲು ಅಥವಾ ಲೋಹದ ಶಿಲ್ಪಗಳಿಗೆ ಹೋಲಿಸಿದರೆ ಫೈಬರ್ ಶಿಲ್ಪಗಳು ತೂಕದಲ್ಲಿ ತುಂಬಾ ಹಗುರವಾಗಿರುತ್ತದೆ. ಇದರಿಂದಾಗಿ ಇವುಗಳನ್ನು ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಸುಲಭವಾಗಿ ಸಾಗಿಸಬಹುದು.

ಶಿಲ್ಪ ತಯಾರಿಕಾ ಹಂತ:
ಫೈಬರ್ ಶಿಲ್ಪದ ತಯಾರಿಕೆಯು ಕಲಾತ್ಮಕತೆ ಮತ್ತು ತಾಂತ್ರಿಕ ಜ್ಞಾನ ಎರಡನ್ನೂ ಒಳಗೊಂಡಿದೆ. ಇದು ಹಲವು ಹಂತಗಳನ್ನು ಒಳಗೊಂಡಿದೆ. ​ಯಾವ ಶಿಲ್ಪವನ್ನು ತಯಾರಿಸಬೇಕೋ, ಅದರ ಮೂಲ ಮಾದರಿಯನ್ನು ಮೊದಲು ಜೇಡಿಮಣ್ಣು-ಮೇಣ ಬಳಸಿ ಕಲಾವಿದರು ಕೈಯಾರೆ ಸಿದ್ಧಪಡಿಸುತ್ತಾರೆ. ದೊಡ್ಡ ಶಿಲ್ಪಗಳಾಗಿದ್ದರೆ ಒಳಭಾಗದಲ್ಲಿ ಕಬ್ಬಿಣದ ಕಡ್ಡಿಗಳ ಆಸರೆಯನ್ನು ನೀಡುತ್ತಾರೆ. ಮಣ್ಣಿನ ಮಾದರಿ ಸಿದ್ಧವಾದ ನಂತರ, ಅದರ ಸುತ್ತಲೂ ಅಚ್ಚನ್ನು ತಯಾರಿಸಬೇಕು. ಇದಕ್ಕಾಗಿ ಮಣ್ಣಿನ ಮೂರ್ತಿಯ ಮೇಲೆ ‘ರಿಲೀಸ್ ಏಜೆಂಟ್’ ಹಚ್ಚಿ, ಅದರ ಮೇಲೆ ಪ್ಲಾಸ್ಟರ್ ಆಫ್ ಪ್ಯಾರಿಸ್ ಅನ್ನು ಲೇಪಿಸಲಾಗುತ್ತದೆ. ದೊಡ್ಡ ಮೂರ್ತಿಗಳಾಗಿದ್ದರೆ ಅಚ್ಚನ್ನು ಎರಡು-ಮೂರು ಭಾಗಗಳಾಗಿ ಮಾಡಲಾಗುತ್ತದೆ. ಇದು ಒಣಗಿದ ನಂತರ ಒಳಗಿರುವ ಮಣ್ಣನ್ನು ತೆಗೆದುಹಾಕಿದರೆ, ನಮಗೆ ಬೇಕಾದ ನಿಖರವಾದ ನೆಗೆಟಿವ್ ಅಚ್ಚು ಸಿಗುತ್ತದೆ.
​ತಯಾರಾದ ಅಚ್ಚಿನ ಒಳಭಾಗವನ್ನು ಚೆನ್ನಾಗಿ ಸ್ವಚ್ಛಗೊಳಿಸಿ ಒಣಗಿಸಲಾಗುತ್ತದೆ. ನಂತರ ಅದಕ್ಕೆ ವ್ಯಾಕ್ಸ್ ಸವರಲಾಗುತ್ತದೆ. ಇದರಿಂದ ನಾವು ಹಾಕುವ ಫೈಬರ್ ಮಿಶ್ರಣವು ಅಚ್ಚಿಗೆ ಅಂಟಿಕೊಳ್ಳದೆ ಸುಲಭವಾಗಿ ಹೊರಬರುತ್ತದೆ.​ಮೊದಲು ಅಚ್ಚಿನ ಒಳಭಾಗಕ್ಕೆ ರೆಸಿನ್ ಮತ್ತು ಬಣ್ಣ ಮಿಶ್ರಿತ ‘ಜೆಲ್ ಕೋಟ್’ ಅನ್ನು ಬ್ರಷ್ ಮೂಲಕ ಹಚ್ಚಲಾಗುತ್ತದೆ. ಇದು ಶಿಲ್ಪದ ಹೊರಗಿನ ನಯವಾದ ಚರ್ಮದಂತೆ ಕೆಲಸ ಮಾಡುತ್ತದೆ.
ಜೆಲ್ ಕೋಟ್ ಸ್ವಲ್ಪ ಒಣಗಿದ ನಂತರ, ಪಾಲಿಯೆಸ್ಟರ್ ರೆಸಿನ್, ಕ್ಯಾಟಲಿಸ್ಟ್ ಮತ್ತು ಚಾಕ್ ಪೌಡರ್ ಮಿಶ್ರಣವನ್ನು ಹಚ್ಚಿ, ಅದರ ಮೇಲೆ ಫೈಬರ್ ಗ್ಲಾಸ್ ಮ್ಯಾಟ್ ಅನ್ನು ಇಡಲಾಗುತ್ತದೆ. ನಂತರ ಬ್ರಷ್ ಸಹಾಯದಿಂದ ರೆಸಿನ್ ಅನ್ನು ಮ್ಯಾಟ್ ಮೇಲೆ ಚೆನ್ನಾಗಿ ಒತ್ತಲಾಗುತ್ತದೆ. ಶಿಲ್ಪದ ಗಾತ್ರಕ್ಕೆ ತಕ್ಕಂತೆ 2ರಿಂದ 4 ಪದರಗಳ ಫೈಬರ್ ಮ್ಯಾಟ್ ಅನ್ನು ಲೇಪಿಸಲಾಗುತ್ತದೆ.
​ಲೇವರಿಂಗ್ ಮುಗಿದ ನಂತರ ಅದನ್ನು ಕೆಲವು ಗಂಟೆಗಳ ಕಾಲ ಒಣಗಲು ಬಿಡಬೇಕು. ರಾಸಾಯನಿಕ ಪ್ರಕ್ರಿಯೆಯಿಂದಾಗಿ ಅದು ಸಂಪೂರ್ಣವಾಗಿ ಗಟ್ಟಿಯಾಗುತ್ತದೆ. ಅಚ್ಚು ಬೇರೆ ಬೇರೆ ಭಾಗಗಳಾಗಿದ್ದರೆ, ಆ ಭಾಗಗಳನ್ನು ಒಂದಕ್ಕೊಂದು ಜೋಡಿಸಿ, ಒಳಭಾಗದಿಂದ ಮತ್ತೆ ಫೈಬರ್ ಪಟ್ಟಿಗಳನ್ನು ಹಾಕಿ ಬೆಸುಗೆ ಮಾಡಲಾಗುತ್ತದೆ.​ಫೈಬರ್ ಸಂಪೂರ್ಣವಾಗಿ ಗಟ್ಟಿಯಾದ ನಂತರ ಹೊರಗಿನ ಅಚ್ಚನ್ನು ಜಾಗರೂಕತೆಯಿಂದ ತೆಗೆಯಲಾಗುತ್ತದೆ. ಈಗ ಮೂಲ ಮಾದರಿಯಂತೆಯೇ ಇರುವ ಫೈಬರ್ ಶಿಲ್ಪ ಹೊರಬರುತ್ತದೆ.
ಬಣ್ಣ ಬಳಿಯುವಿಕೆ ​ಇದು ಅತ್ಯಂತ ಕೊನೆಯ ಮತ್ತು ಕಲಾತ್ಮಕ ಹಂತ. ಶಿಲ್ಪಕ್ಕೆ ಮೊದಲು ಪ್ರೈಮರ್ ಹಚ್ಚಲಾಗುತ್ತದೆ. ನಂತರ ಗ್ರಾಹಕರ ಅಥವಾ ಕಲಾವಿದರ ಕಲ್ಪನೆಗೆ ತಕ್ಕಂತೆ ಬಣ್ಣಗಳನ್ನು ಬಳಸಿ ಶಿಲ್ಪಕ್ಕೆ ಜೀವ ನೀಡಲಾಗುತ್ತದೆ. ಕೊನೆಯಲ್ಲಿ ಬಣ್ಣ ಮಾಸದಂತೆ ತಡೆಯಲು ಕ್ಲಿಯರ್ ಕೋಟ್ ಸ್ಪ್ರೇ ಮಾಡಲಾಗುತ್ತದೆ.

ಕಲೆ ಮತ್ತು ಆಧುನಿಕ ತಂತ್ರಜ್ಞಾನದ ಸಮ್ಮಿಲನ:
ಫೈಬರ್ ಮೂರ್ತಿಗಳನ್ನು ಕಡಿಮೆ ವೆಚ್ಚದಲ್ಲಿ ಮತ್ತು ವೇಗವಾಗಿ ತಯಾರಿಸಬಹುದು. ಫೈಬರ್ ಮಾಧ್ಯಮದಲ್ಲಿ ಅತ್ಯಂತ ಸೂಕ್ಷ್ಮವಾದ ಕೆತ್ತನೆಗಳು, ಮುಖದ ಭಾವನೆಗಳು ಮತ್ತು ಸಂಕೀರ್ಣ ವಿನ್ಯಾಸಗಳನ್ನು ಅತ್ಯಂತ ನಿಖರವಾಗಿ ಮೂಡಿಸಬಹುದು.ಫೈಬರ್ ಶಿಲ್ಪಗಳಿಗೆ ಸೂಕ್ತವಾದ ಬಣ್ಣ ಬಳಿಯುವ ಮೂಲಕ ಅವುಗಳನ್ನು ಕಲ್ಲು, ಕಂಚು, ಮರ ಅಥವಾ ಚಿನ್ನದ ಮೂರ್ತಿಗಳಂತೆ ಕಣ್ಣಿಗೆ ಕಟ್ಟುವಂತೆ ಭ್ರಮೆ ಮೂಡಿಸಬಹುದು.
​ಫೈಬರ್ ಶಿಲ್ಪಕಲೆಯು ಕಲೆ ಮತ್ತು ಆಧುನಿಕ ತಂತ್ರಜ್ಞಾನದ ಸಮ್ಮಿಲನವಾಗಿದೆ. ಇದು ಸಾಂಪ್ರದಾಯಿಕ ಶಿಲ್ಪಕಲೆಗೆ ಪರ್ಯಾಯವಾಗಿ ಬೆಳೆದು ನಿಂತಿದೆ. ಕಡಿಮೆ ವೆಚ್ಚ, ದೀರ್ಘಕಾಲ ಬಾಳಿಕೆ ಮತ್ತು ಸಾಗಣೆಯ ಸುಲಭತೆಯಿಂದಾಗಿ ಇಂದು ವಾಣಿಜ್ಯ ಮತ್ತು ಕಲಾತ್ಮಕ ಕ್ಷೇತ್ರಗಳಲ್ಲಿ ಫೈಬರ್ ಶಿಲ್ಪಗಳು ಅತ್ಯಂತ ಮಹತ್ವದ ಪಾತ್ರವನ್ನು ವಹಿಸುತ್ತಿವೆ. ಕಲಾವಿದರ ಸೃಜನಶೀಲತೆಗೆ ಹೊಸ ಆಯಾಮ ನೀಡಿರುವ ಈ ತಂತ್ರಜ್ಞಾನವು ಮುಂಬರುವ ದಿನಗಳಲ್ಲಿ ಇನ್ನಷ್ಟು ಆಧುನಿಕ ಆವಿಷ್ಕಾರಗಳಿಗೆ ಸಾಕ್ಷಿಯಾಗುವುದರಲ್ಲಿ ಸಂದೇಹವಿಲ್ಲ.

ಶಿವರಾಜ ಕಮ್ಮಾರ ರವರ ‘ಹರ ಶಿಲ್ಪಕಲಾ ಕುಟಿರ’ವು ಸ್ಥಳೀಯ ಕಲೆಗೆ ಜಾಗತಿಕ ಮಾರುಕಟ್ಟೆ ಎಂಬ ಪರಿಕಲ್ಪನೆಗೆ ಅತ್ಯುತ್ತಮ ನಿದರ್ಶನ. ಕಠಿಣ ಪರಿಶ್ರಮ, ಕಲಾತ್ಮಕ ದೃಷ್ಟಿ ಮತ್ತು ಆಧುನಿಕ ತಂತ್ರಜ್ಞಾನದ ಹದವಾದ ಮಿಶ್ರಣವಾಗಿದೆ. ಇದು ಅಬ್ಬಿಗೇರಿ ಗ್ರಾಮದ ಮುಕುಟದ ಮಣಿಯಾಗಿದೆ. ಹರ ಶಿಲ್ಪಕಲಾ ಕುಟಿರ’ವು ಆಧುನಿಕ ಕಲಾ ಲೋಕದಲ್ಲಿ ಕ್ರಾಂತಿಕಾರಿ ಹೆಜ್ಜೆಯನ್ನಿಟ್ಟಿದೆ. ಕೇವಲ ಮಹಾನಗರಗಳಿಗೆ ಸೀಮಿತವಾಗಿದ್ದ ಫೈಬರ್ ತಂತ್ರಜ್ಞಾನವನ್ನು ಗ್ರಾಮೀಣ ಭಾಗಕ್ಕೆ ತಂದು, ಅದನ್ನು ತಮ್ಮದೇ ಆದ ಸೃಜನಶೀಲತೆ ಬೆರೆಸಿ ದಕ್ಷಿಣ ಭಾರತದಾದ್ಯಂತ ಕೀರ್ತಿ ಪತಾಕೆ ಹಾರಿಸಿರುವುದು ಸಾಮಾನ್ಯ ಸಾಧನೆಯಲ್ಲ. ಧಾರ್ಮಿಕ ಭಾವನೆಯಿಂದ ಹಿಡಿದು ಪಾಶ್ಚಾತ್ಯ ಗ್ರೀಕ್ ವಾಸ್ತುಶಿಲ್ಪದವರೆಗೆ ಇವರು ಸೃಷ್ಟಿಸುವ ಪ್ರತಿಯೊಂದು ಕಲಾಕೃತಿಯೂ ಕಲೆಯ ಮೇಲಿರುವ ಅವರ ನಿಷ್ಠೆ ಮತ್ತು ಅಪಾರ ಕೌಶಲ್ಯಕ್ಕೆ ಸಾಕ್ಷಿಯಾಗಿದೆ.ಇದು ಕಲೆಯನ್ನೆ ಜೀವವಾಗಿಸಿಕೊಂಡ, ಶಿಲ್ಪಗಳಿಗೆ ಜೀವ ತುಂಬುವ ಹರ ಶಿಲ್ಪಕುಟಿರ ಆಗಿರುವದಂತೂ ಸತ್ಯ.
ಅಲ್ಲವೆ?